ਪੰਜਾਬ ਦੇ ਭੋਗਪੁਰ ਪਿੰਡ ਲੋਹਾਰਾ ਦੀ ਰਹਿਣ ਵਾਲੀ 53 ਸਾਲਾ ਕਮਲਪ੍ਰੀਤ ਕੌਰ, ਜੋ ਟੂਰਿਸਟ ਵੀਜੇ ‘ਤੇ ਕੈਨੇਡਾ ਆਈ ਹੋਈ ਸੀ, ਦੀ ਟੋਰਾਂਟੋ ਤੋਂ ਦਿੱਲੀ ਜਾ ਰਹੇ ਜਹਾਜ਼ ‘ਚ ਅਚਾਨਕ ਮੌਤ ਹੋ ਗਈ। ਕਮਲਪ੍ਰੀਤ ਕੌਰ ਕੈਨੇਡਾ ਵਿਚ ਆਪਣੇ ਦੋ ਪੁੱਤਰਾਂ ਅਤੇ ਪਹਿਲੇ ਪੋਤੇ ਨੂੰ ਮਿਲਣ ਲਈ ਆਈ ਸੀ। ਵਾਪਸੀ ਦੇ ਸਮੇਂ, ਜਦੋਂ ਜਹਾਜ਼ ਨੇ ਟੋਰਾਂਟੋ ਤੋਂ ਉੱਡਾਨ ਭਰੀ, ਉਸ ਤੋਂ ਢਾਈ ਘੰਟੇ ਬਾਅਦ ਉਹਨੂੰ ਸਾਹ ਲੈਣ ਵਿੱਚ ਦਿੱਕਤ ਹੋਣ ਲੱਗੀ।
ਜਹਾਜ਼ ‘ਚ ਮੌਜੂਦ ਡਾਕਟਰ ਨੇ ਉਸਦੀ ਤਬੀਅਤ ਦੀ ਜਾਂਚ ਕੀਤੀ ਪਰ ਉਸਨੂੰ ਬਚਾਇਆ ਨਹੀਂ ਜਾ ਸਕਿਆ। ਕਮਲਪ੍ਰੀਤ ਦੀ ਮੌਤ ਤੋਂ ਬਾਅਦ ਜਹਾਜ਼ ਨੂੰ ਵਾਪਸ ਟੋਰਾਂਟੋ ਲੈ ਜਾਇਆ ਗਿਆ। ਯਾਤਰੀਆਂ ਨੂੰ ਸਿਰਫ਼ ਇਹ ਦੱਸਿਆ ਗਿਆ ਕਿ ਤਕਨੀਕੀ ਕਾਰਨ ਕਰਕੇ ਜਹਾਜ਼ ਮੁੜ ਰਿਹਾ ਹੈ, ਪਰ ਅਸਲ ਘਟਨਾ ਦੀ ਜਾਣਕਾਰੀ ਨਹੀਂ ਦਿੱਤੀ ਗਈ।
ਕਮਲਪ੍ਰੀਤ ਦੇ ਪਤੀ ਮਨਜੀਤ ਸਿੰਘ, ਜੋ ਭੋਗਪੁਰ ਪਿੰਡ ਦੇ ਸਕੂਲ ‘ਚ ਲੈਬ ਅਟੈਂਡੈਂਟ ਹਨ, ਨੇ ਦੱਸਿਆ ਕਿ ਉਹ ਆਪਣੀ ਪਤਨੀ ਨੂੰ ਦਿੱਲੀ ਏਅਰਪੋਰਟ ਤੋਂ ਲੈਣ ਜਾ ਰਹੇ ਸਨ। ਰਸਤੇ ‘ਚ ਉਹ ਜਹਾਜ਼ ਦੀ ਆਨਲਾਈਨ ਟਰੈਕਿੰਗ ਕਰਦੇ ਰਹੇ ਪਰ ਖੰਨਾ ਪਹੁੰਚਣ ‘ਤੇ ਸਟੇਟਸ ਦੇਖਣਾ ਬੰਦ ਹੋ ਗਿਆ। ਇਸ ਤੋਂ ਬਾਅਦ, ਉਨ੍ਹਾਂ ਦੇ ਪੁੱਤਰਾਂ ਨੇ ਸੂਚਨਾ ਦਿੱਤੀ ਕਿ ਕਮਲਪ੍ਰੀਤ ਦੀ ਜਹਾਜ਼ ‘ਚ ਹੀ ਮੌਤ ਹੋ ਗਈ ਹੈ।
ਕੈਨੇਡੀਅਨ ਅਧਿਕਾਰੀਆਂ ਅਨੁਸਾਰ ਮ੍ਰਿਤਕਾ ਦੀ ਦੇਹ ਦਾ ਪੋਸਟਮਾਰਟਮ ਕੀਤਾ ਜਾ ਰਿਹਾ ਹੈ, ਜੋ ਇਹ ਪਤਾ ਲਗਾਉਣ ਵਿੱਚ ਮਦਦ ਕਰੇਗਾ ਕਿ ਮੌਤ ਦਾ ਅਸਲ ਕਾਰਨ ਕੀ ਸੀ। ਪਰਿਵਾਰ ਇਸ ਹਦਸੇ ਕਾਰਨ ਸੋਗ ਵਿੱਚ ਹੈ ਅਤੇ ਉਨ੍ਹਾਂ ਨੂੰ ਮਾਣਸਿਕ ਅਤੇ ਕਾਨੂੰਨੀ ਪ੍ਰਕਿਰਿਆਵਾਂ ਨਾਲ ਜੂਝਣਾ ਪੈ ਰਿਹਾ ਹੈ।
