ਚੀਨ ਵਿੱਚ ਕੈਨੋਲਾ ਟੈਰਿਫ਼ ਮਸਲੇ ਦੇ ਹੱਲ ਦੀ ਆਸ: ਕੈਨੇਡੀਅਨ ਕਿਸਾਨਾਂ ਦੀ ਨਜ਼ਰ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦੇ ਦੌਰੇ ‘ਤੇ |

Canada canola tariffs China: ਚੀਨ ਟੈਰਿਫ਼ ਹੱਲ ਦੀ ਉਮੀਦ |

ਕੈਨੇਡਾ ਦੇ ਕਿਸਾਨਾਂ ਨੂੰ ਉਮੀਦ ਹੈ ਕਿ ਇਸ ਹਫ਼ਤੇ ਚੀਨ ਦੌਰੇ ਦੌਰਾਨ ਪ੍ਰਧਾਨ ਮੰਤਰੀ Mark Carney ਕੈਨੋਲਾ ‘ਤੇ ਲੱਗੇ ਭਾਰੀ ਟੈਰਿਫ਼ਸ ਦੇ ਮਸਲੇ ਦਾ ਕੋਈ ਹੱਲ ਕੱਢਣਗੇ। ਚੀਨ ਵੱਲੋਂ ਲਗਾਈਆਂ ਗਈਆਂ ਸਖ਼ਤ ਡਿਊਟੀਆਂ ਨੇ Prairie provinces ਦੇ ਕਿਸਾਨਾਂ ਨੂੰ ਗੰਭੀਰ ਵਿੱਤੀ ਨੁਕਸਾਨ ਪਹੁੰਚਾਇਆ ਹੈ।

ਕੈਨੇਡੀਅਨ ਕੈਨੋਲਾ ਗਰੋਅਰਜ਼ ਐਸੋਸੀਏਸ਼ਨ ਦੇ ਪ੍ਰਧਾਨ Rick White ਨੇ ਕਿਹਾ ਕਿ ਜੇ ਇਹ ਮਸਲਾ ਜਲਦੀ ਹੱਲ ਨਾ ਹੋਇਆ ਤਾਂ 2026 ਵਿੱਚ ਕਿਸਾਨਾਂ ਨੂੰ ਘੱਟੋ-ਘੱਟ $2 billion ਦਾ ਨੁਕਸਾਨ ਹੋ ਸਕਦਾ ਹੈ।

ਉਨ੍ਹਾਂ ਕਿਹਾ, “ਕਿਸਾਨ ਪਹਿਲਾਂ ਹੀ ਨਿਰਾਸ਼ ਅਤੇ ਤਣਾਅ ਵਿੱਚ ਹਨ। ਹਰ ਦਿਨ, ਹਰ ਹਫ਼ਤਾ ਇਹ ਸਮੱਸਿਆ ਵਧਦੀ ਜਾ ਰਹੀ ਹੈ।”

ਪ੍ਰਧਾਨ ਮੰਤਰੀ ਕਾਰਨੀ ਦਾ ਦੌਰਾ ਬੁੱਧਵਾਰ ਤੋਂ ਸ਼ੁਰੂ ਹੋ ਰਿਹਾ ਹੈ। ਇਸ ਦੌਰੇ ਵਿੱਚ ਕੇਂਦਰੀ ਮੰਤਰੀਆਂ ਦੇ ਨਾਲ Saskatchewan Premier Scott Moe ਵੀ ਸ਼ਾਮਲ ਹੋਣਗੇ। ਇਸ ਤੋਂ ਇਲਾਵਾ, ਕਾਰਨੀ ਦੀ ਮੁਲਾਕਾਤ ਚੀਨ ਦੇ ਰਾਸ਼ਟਰਪਤੀ Xi Jinping ਨਾਲ ਵੀ ਤੈਅ ਹੈ।

Saskatchewan, ਜੋ ਕੈਨੇਡਾ ਦੀ ਕੁੱਲ ਕੈਨੋਲਾ ਉਤਪਾਦਨ ਦਾ ਅੱਧ ਤੋਂ ਵੱਧ ਹਿੱਸਾ ਪੈਦਾ ਕਰਦਾ ਹੈ, ਚੀਨ ਦੇ ਟੈਰਿਫ਼ਸ ਨਾਲ ਸਭ ਤੋਂ ਜ਼ਿਆਦਾ ਪ੍ਰਭਾਵਿਤ ਹੋਇਆ ਹੈ। Rick White ਦਾ ਮੰਨਣਾ ਹੈ ਕਿ Scott Moe ਦੀ ਹਾਜ਼ਰੀ ਕਿਸਾਨਾਂ ਦੀ ਆਵਾਜ਼ ਨੂੰ ਮਜ਼ਬੂਤੀ ਦੇਵੇਗੀ ਅਤੇ ਇਸ ਨਾਲ ਪ੍ਰਧਾਨ ਮੰਤਰੀ ਨੂੰ Canada ਦਾ ਪੱਖ ਰੱਖਣ ਵਿੱਚ ਮਦਦ ਮਿਲੇਗੀ।

ਕੈਨੇਡਾ ਅਤੇ China ਦਰਮਿਆਨ ਵਪਾਰਕ ਸਬੰਧ ਕਈ ਸਾਲਾਂ ਤੋਂ ਤਣਾਅਪੂਰਨ ਰਹੇ ਹਨ, ਪਰ 2024 ਵਿੱਚ ਹਾਲਾਤ ਹੋਰ ਵੀ ਖ਼ਰਾਬ ਹੋ ਗਏ। ਅਕਤੂਬਰ 2024 ਵਿੱਚ Ottawa ਨੇ Chinese electric vehicles ਅਤੇ steel ‘ਤੇ ਟੈਰਿਫ਼ ਲਗਾਏ, ਜਿਸ ਦੇ ਜਵਾਬ ਵਜੋਂ ਚੀਨ ਨੇ ਕੈਨੇਡੀਅਨ ਖੇਤੀਬਾੜੀ ਉਤਪਾਦਾਂ ‘ਤੇ ਡਿਊਟੀਆਂ ਲਾਗੂ ਕਰ ਦਿੱਤੀਆਂ।

ਅਗਸਤ ਵਿੱਚ ਚੀਨ ਨੇ ਕੈਨੋਲਾ ਸੀਡ ‘ਤੇ 76% tariff ਲਗਾ ਦਿੱਤਾ, ਜਿਸ ਤੋਂ ਬਾਅਦ ਚੀਨ ਨੇ ਕੈਨੇਡਾ ਤੋਂ ਕੈਨੋਲਾ ਖਰੀਦਣੀ ਲਗਭਗ ਬੰਦ ਕਰ ਦਿੱਤੀ। ਇਸ ਨਾਲ ਕੈਨੇਡੀਅਨ ਕਿਸਾਨਾਂ ਦੀ ਆਮਦਨ ‘ਤੇ ਸਿੱਧਾ ਅਸਰ ਪਿਆ ਹੈ।

Agricultural Producers Association of Saskatchewan ਦੇ ਪ੍ਰਧਾਨ Bill Prybylski ਨੇ ਕਿਹਾ ਕਿ ਉਹ ਕਾਰਨੀ ਦੇ ਦੌਰੇ ਤੋਂ ਬਹੁਤ ਵੱਡੀਆਂ ਉਮੀਦਾਂ ਨਹੀਂ ਰੱਖ ਰਹੇ, ਪਰ ਉਮੀਦ ਹੈ ਕਿ ਇਹ ਮੀਟਿੰਗਾਂ ਭਵਿੱਖ ਲਈ ਰਾਹ ਖੋਲ੍ਹਣਗੀਆਂ।

ਉੱਥੇ ਹੀ Alberta ਦੇ Grande Prairie ਨੇੜੇ ਕਿਸਾਨ Andre Harpe ਨੇ ਕਿਹਾ ਕਿ ਸਭ ਤੋਂ ਵੱਡੀ ਆਸ ਇਹ ਹੈ ਕਿ ਕੈਨੇਡੀਅਨ ਕੈਨੋਲਾ ‘ਤੇ ਲੱਗੇ ਟੈਰਿਫ਼ ਹਟਾਏ ਜਾਣ ਅਤੇ ਚੀਨ ਨਾਲ ਪੁਰਾਣਾ ਵਪਾਰਕ ਰਿਸ਼ਤਾ ਦੁਬਾਰਾ ਬਣੇ।

Manitoba Canola Growers ਦੀ Executive Director Delaney Ross Burtnack ਨੇ ਕਿਹਾ ਕਿ ਕਿਸਾਨ ਮੌਜੂਦਾ ਕੀਮਤਾਂ ਤੋਂ ਹੇਠਾਂ ਕੈਨੋਲਾ ਵੇਚਣ ਦੀ ਸਥਿਤੀ ਵਿੱਚ ਨਹੀਂ ਹਨ ਅਤੇ ਇਸ ਮਸਲੇ ਦਾ ਜਲਦੀ ਹੱਲ ਲੱਭਣਾ ਬਹੁਤ ਜ਼ਰੂਰੀ ਹੈ।

ਇਸ ਵਿਚਕਾਰ, ਚੀਨੀ EV tariff ਨੂੰ ਲੈ ਕੇ ਕੈਨੇਡਾ ਅੰਦਰ ਵੀ ਸਿਆਸੀ ਦਬਾਅ ਬਣਿਆ ਹੋਇਆ ਹੈ। ਕੁਝ ਨੇਤਾਵਾਂ ਇਸਨੂੰ ਹਟਾਉਣ ਦੀ ਮੰਗ ਕਰ ਰਹੇ ਹਨ, ਜਦਕਿ Ontario Premier Doug Ford ਇਸਨੂੰ ਜਾਰੀ ਰੱਖਣ ਦੇ ਹੱਕ ਵਿੱਚ ਹਨ। ਕਿਸਾਨ ਸੰਗਠਨਾਂ ਦਾ ਕਹਿਣਾ ਹੈ ਕਿ EV tariff ਇੱਕ ਜਟਿਲ ਰਾਜਨੀਤਿਕ ਮਸਲਾ ਹੈ, ਪਰ ਉਹਨਾਂ ਦੀ ਪਹਿਲੀ ਤਰਜੀਹ ਕੈਨੋਲਾ ਟੈਰਿਫ਼ਸ ਦਾ ਖ਼ਾਤਮਾ ਹੈ।