Gordie Howe Bridge ਵਿਵਾਦ ‘ਤੇ Carney–Trump ਗੱਲਬਾਤ, ਕੈਨੇਡਾ ਨੇ ਆਪਣਾ ਪੱਖ ਸਾਫ਼ ਕੀਤਾ |
Gordie Howe Bridge ਮਾਮਲੇ ‘ਤੇ Carney ਦੀ Trump ਨਾਲ ਗੱਲ |
Gordie Howe ਇੰਟਰਨੈਸ਼ਨਲ ਬ੍ਰਿਜ ਨੂੰ ਲੈ ਕੇ ਚੱਲ ਰਹੇ ਵਿਵਾਦ ਦਰਮਿਆਨ ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਅੱਜ ਸਵੇਰੇ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨਾਲ ਫ਼ੋਨ ‘ਤੇ ਗੱਲਬਾਤ ਕੀਤੀ। ਇਹ ਗੱਲਬਾਤ ਉਸ ਤੋਂ ਬਾਅਦ ਹੋਈ ਹੈ ਜਦੋਂ ਟਰੰਪ ਨੇ ਬ੍ਰਿਜ ਦੇ ਖੁਲ੍ਹਣ ਨੂੰ ਰੋਕਣ ਦੀ ਧਮਕੀ ਦਿੱਤੀ ਸੀ।
ਪ੍ਰਧਾਨ ਮੰਤਰੀ ਕਾਰਨੀ ਨੇ ਦੱਸਿਆ ਕਿ ਉਨ੍ਹਾਂ ਨੇ ਟਰੰਪ ਨੂੰ ਸਪਸ਼ਟ ਤੌਰ ‘ਤੇ ਸਮਝਾਇਆ ਕਿ Gordie Howe ਬ੍ਰਿਜ ਦੀ ਪੂਰੀ ਲਾਗਤ ਕੈਨੇਡਾ ਦੀ ਫੈਡਰਲ ਸਰਕਾਰ ਵੱਲੋਂ ਭਰੀ ਗਈ ਹੈ ਅਤੇ ਇਸ ਦੀ ਮਾਲਕੀ ਕੈਨੇਡਾ ਸਰਕਾਰ ਅਤੇ ਅਮਰੀਕਾ ਦੇ ਮਿਚੀਗਨ ਰਾਜ ਦੀ ਸਰਕਾਰ ਵਿਚਕਾਰ ਸਾਂਝੀ ਹੈ।
ਕਾਰਨੀ ਮੁਤਾਬਕ, ਗੱਲਬਾਤ ਦੌਰਾਨ ਉਨ੍ਹਾਂ ਨੇ ਇਹ ਵੀ ਜ਼ਿਕਰ ਕੀਤਾ ਕਿ ਬ੍ਰਿਜ ਦੀ ਤਾਮੀਰ ਵਿੱਚ ਦੋਵਾਂ ਦੇਸ਼ਾਂ—ਕੈਨੇਡਾ ਅਤੇ ਅਮਰੀਕਾ—ਦਾ ਸਟੀਲ ਵਰਤਿਆ ਗਿਆ ਹੈ, ਜਿਸ ਨਾਲ ਇਹ ਪ੍ਰਾਜੈਕਟ ਦੋਹਾਂ ਦੇਸ਼ਾਂ ਲਈ ਸਾਂਝਾ ਆਰਥਿਕ ਅਤੇ ਉਦਯੋਗਿਕ ਲਾਭ ਬਣਦਾ ਹੈ।
Gordie Howe ਬ੍ਰਿਜ ਨੂੰ ਕੈਨੇਡਾ–ਅਮਰੀਕਾ ਵਪਾਰ ਲਈ ਇੱਕ ਅਹਿਮ ਬੁਨਿਆਦੀ ਢਾਂਚਾ ਮੰਨਿਆ ਜਾਂਦਾ ਹੈ, ਜੋ ਵਿਂਡਸਰ (ਓਨਟਾਰੀਓ) ਅਤੇ ਡਿਟਰਾਇਟ (ਮਿਚੀਗਨ) ਨੂੰ ਜੋੜਦਾ ਹੈ। ਇਹ ਬ੍ਰਿਜ ਐਂਬੈਸਡਰ ਬ੍ਰਿਜ ‘ਤੇ ਪੈ ਰਹੇ ਵਧੇਰੇ ਦਬਾਅ ਨੂੰ ਘਟਾਉਣ ਅਤੇ ਆਟੋ ਸੈਕਟਰ ਸਮੇਤ ਸਪਲਾਈ ਚੇਨ ਨੂੰ ਮਜ਼ਬੂਤ ਕਰਨ ਲਈ ਬਹੁਤ ਮਹੱਤਵਪੂਰਨ ਹੈ।
ਪ੍ਰਧਾਨ ਮੰਤਰੀ ਦਫ਼ਤਰ ਵੱਲੋਂ ਜਾਰੀ ਜਾਣਕਾਰੀ ਮੁਤਾਬਕ, ਕਾਰਨੀ ਨੇ ਟਰੰਪ ਨੂੰ ਦੱਸਿਆ ਕਿ Gordie Howe ਬ੍ਰਿਜ ਦੋਹਾਂ ਦੇਸ਼ਾਂ ਦੇ ਕਾਰੋਬਾਰਾਂ, ਨੌਕਰੀਆਂ ਅਤੇ ਖਪਤਕਾਰਾਂ ਲਈ ਲਾਭਦਾਇਕ ਹੈ ਅਤੇ ਇਸਨੂੰ ਰੋਕਣ ਨਾਲ ਦੋਹਾਂ ਪਾਸਿਆਂ ਨੂੰ ਆਰਥਿਕ ਨੁਕਸਾਨ ਹੋ ਸਕਦਾ ਹੈ।
ਇਹ ਗੱਲਬਾਤ ਉਸ ਸਮੇਂ ਹੋਈ ਹੈ ਜਦੋਂ ਕੈਨੇਡਾ–ਅਮਰੀਕਾ ਵਿਚਕਾਰ ਵਪਾਰਕ ਤਣਾਅ ਅਤੇ CUSMA ਸਮਝੌਤੇ ਦੀ ਸਮੀਖਿਆ ਕਾਰਨ ਰਿਸ਼ਤੇ ਸੰਵੇਦਨਸ਼ੀਲ ਦੌਰ ਵਿੱਚ ਹਨ।
