ਉਨਟਾਰੀਓ ਵਿੱਚ ਬੈਂਕ ਲੁੱਟਾਂ ਦੀ ਲੜੀ ’ਤੇ ਪੁਲਿਸ ਦੀ ਵੱਡੀ ਕਾਰਵਾਈ, ਚਾਰ ਗ੍ਰਿਫ਼ਤਾਰ, ਇਕ ਫਰਾਰ
ਉਨਟਾਰੀਓ ਦੇ ਵੱਖ-ਵੱਖ ਸ਼ਹਿਰਾਂ ਵਿੱਚ ਬੈਂਕ ਲੁੱਟਾਂ ਦੀ ਲੜੀ ਦੀ ਪੜਤਾਲ ਕਰ ਰਹੀ ਓਨਟਾਰੀਓ ਪ੍ਰੋਵਿਨਸ਼ੀਅਲ ਪੁਲਿਸ (ਓ.ਪੀ.ਪੀ.) ਨੇ ਚਾਰ ਸ਼ੱਕੀਆਂ ਨੂੰ ਗ੍ਰਿਫ਼ਤਾਰ ਕਰਨ ਦਾ ਦਾਅਵਾ ਕੀਤਾ ਹੈ, ਜਦਕਿ ਇਕ ਅਜੇ ਵੀ ਪੁਲਿਸ ਦੀ ਪਹੁੰਚ ਤੋਂ ਬਾਹਰ ਹੈ। ਇਹ ਸਾਰੇ ਹਮਲੇ 2022 ਤੋਂ 2024 ਤੱਕ ਦੀ ਅਵਧੀ ਵਿੱਚ ਹੋਏ, ਜਿਨ੍ਹਾਂ ਵਿੱਚ ਕੁੱਲ 20 ਲੱਖ ਡਾਲਰ ਤੋਂ ਵੱਧ ਦੀ ਰਕਮ ਲੁੱਟੀ ਗਈ।
ਪੁਲਿਸ ਮੁਤਾਬਕ, 8 ਵਾਰਦਾਤਾਂ ਵਿੱਚ ਸ਼ਾਮਿਲ ਚਾਰ ਗ੍ਰਿਫ਼ਤਾਰ ਸ਼ੱਕੀਆਂ ਬੈਰੀ, ਬੈਲਵਿਲ, ਡਰਹਮ, ਨਿਆਗਰਾ ਅਤੇ ਯਾਰਕ ਰੀਜਨ ਦੇ ਬੈਂਕਾਂ ’ਤੇ ਨਿਸ਼ਾਨਾ ਬਣਾਉਂਦੇ ਸਨ। ਇਹਨਾਂ ਵਾਰਦਾਤਾਂ ਵਿੱਚ ਤਿੰਨ ਜਾਂ ਤਿੰਨ ਤੋਂ ਵੱਧ ਹਮਲਾਵਰ ਭੇਖ ਬਦਲ ਕੇ ਬੈਂਕ ਅੰਦਰ ਦਾਖਲ ਹੁੰਦੇ ਅਤੇ ਸਟਾਫ ਤੇ ਗਾਹਕਾਂ ਨੂੰ ਹਥਿਆਰ ਦੀ ਨੋਕ ’ਤੇ ਕਾਬੂ ਕਰਦੇ ਹੋਏ ਨਕਦੀ ਲੁੱਟਦੇ। ਖਾਸ ਗੱਲ ਇਹ ਰਿਹਾ ਕਿ ਇਸ ਸਮੇਂ ਦੌਰਾਨ ਕੋਈ ਗੋਲੀ ਨਹੀਂ ਚੱਲੀ ਅਤੇ ਕੋਈ ਵੀ ਜ਼ਖਮੀ ਨਹੀਂ ਹੋਇਆ।
21 ਜੂਨ, 2024 ਨੂੰ ਨਿਪੀਸਿੰਗ ਡਿਸਟ੍ਰਿਕਟ ਵਿੱਚ ਇਕ ਲੁੱਟ ਦੌਰਾਨ ਤਿੰਨ ਸ਼ੱਕੀਆਂ ਨੂੰ ਕਾਬੂ ਕੀਤਾ ਗਿਆ ਸੀ, ਜਦਕਿ ਚੌਥੇ ਸ਼ੱਕੀ ਨੂੰ 25 ਸਤੰਬਰ ਨੂੰ ਵੌਅਨ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ। ਹਾਲਾਂਕਿ, ਪੰਜਵਾਂ ਸ਼ੱਕੀ ਹੁਣ ਤੱਕ ਪੁਲਿਸ ਦੀ ਪਕੜ ਤੋਂ ਬਾਹਰ ਹੈ।
ਇਹਨਾਂ ਪੰਜਾਂ ’ਤੇ ਬੈਂਕ ਲੁੱਟਣ, ਹਥਿਆਰ ਰੱਖਣ ਅਤੇ ਗੰਭੀਰ ਅਪਰਾਧ ਦੀ ਸਾਜ਼ਿਸ਼ ਕਰਨ ਦੇ ਦੋਸ਼ ਲਗਾਏ ਗਏ ਹਨ। ਓਨਟਾਰੀਓ ਪ੍ਰੋਵਿਨਸ਼ੀਅਲ ਪੁਲਿਸ ਦੇ ਡਿਪਟੀ ਕਮਿਸ਼ਨਰ ਮਾਰਟੀ ਕਿਅਰਨਜ਼ ਨੇ ਦੱਸਿਆ ਕਿ “ਪ੍ਰੌਜੈਕਟ ਓਪਲ” ਤਹਿਤ ਕੀਤੀ ਗਈ ਇਹ ਗ੍ਰਿਫ਼ਤਾਰੀ ਮੁਹਿੰਮ ਵਿੱਚ ਕਈ ਹੋਰ ਪੁਲਿਸ ਵਿਭਾਗਾਂ ਨੇ ਵੀ ਸਹਿਯੋਗ ਦਿੱਤਾ।
ਓ.ਪੀ.ਪੀ. ਨੇ ਇਸ ਕਾਰਵਾਈ ਨਾਲ ਕਮਿਊਨਟੀ ਵਿੱਚ ਸੁਰੱਖਿਆ ਦਾ ਮਾਹੌਲ ਬਣਾ ਕੇ ਰੱਖਿਆ ਹੈ, ਜਿਸ ਨਾਲ ਲੋਕਾਂ ਨੂੰ ਲੁੱਟਾਂ ਦੀ ਲਹਿਰ ਦੇ ਡਰ ਤੋਂ ਬਚਾਇਆ ਜਾ ਸਕੇ। ਇਹ ਅਧਿਕਾਰੀਆਂ ਨੇ ਕਿਹਾ ਕਿ ਜੇਕਰ ਲੋਕਾਂ ਕੋਲ ਇਸ ਮਾਮਲੇ ਬਾਰੇ ਹੋਰ ਜਾਣਕਾਰੀ ਹੋਵੇ ਤਾਂ ਉਹ ਸਿੱਧੇ ਆਪਣੇ ਸਥਾਨਕ ਪੁਲਿਸ ਵਿਭਾਗ ਨਾਲ ਸੰਪਰਕ ਕਰ ਸਕਦੇ ਹਨ।
ਪੁਲਿਸ ਨੇ ਦੱਸਿਆ ਹੈ ਕਿ ਇਸ ਮੁਹਿੰਮ ਤਹਿਤ ਹੋਰ ਸੰਭਾਵੀ ਵਾਰਦਾਤਾਂ ਨੂੰ ਰੋਕਣ ਲਈ ਅੱਗੇ ਵੀ ਕੜੀ ਕਾਰਵਾਈ ਕੀਤੀ ਜਾਵੇਗੀ।
