ਕੈਨੇਡਾ – ਪਿਛਲੇ ਹਫ਼ਤੇ ਹਾਈਵੇਅ 17 ‘ਤੇ ਹੋਈ ਦੋ ਸੈਮੀ-ਟਰੱਕਾਂ ਦੀ ਭਿਆਨਕ ਟੱਕਰ ਵਿੱਚ ਇੱਕ ਡਰਾਈਵਰ ਦੀ ਮੌਤ ਹੋ ਗਈ। ਸਰੀ ਪੁਲਸ ਨੇ ਦੱਸਿਆ ਕਿ ਹਾਦਸੇ ਵਿੱਚ 41 ਸਾਲਾ ਪੰਜਾਬੀ ਡਰਾਈਵਰ ਸੰਦੀਪ ਸਿੰਘ ਚੀਮਾ ਦੀ ਜਾਨ ਚਲੀ ਗਈ।
ਸੰਦੀਪ ਸਿੰਘ ਚੀਮਾ, ਜੋ ਦੋ ਕੁੜੀਆਂ ਦਾ ਪਿਤਾ ਸੀ, ਆਪਣਾ ਕੰਮ ਮੁਕਾ ਕੇ ਰਾਤ ਨੂੰ ਆਪਣੇ ਟ੍ਰੇਲਰ ਨੂੰ ਪਾਰਕ ਕਰਨ ਲਈ ਜਾ ਰਿਹਾ ਸੀ। ਉਸ ਦੀਆਂ 6 ਸਾਲ ਦੀ ਧੀ ਸਰਗੁਣ ਅਤੇ 2 ਸਾਲ ਦੀ ਧੀ ਮੇਹਰ ਹਨ, ਜਦਕਿ ਉਸ ਦੀ ਪਤਨੀ ਦਾ ਨਾਮ ਮਨਜੀਤ ਹੈ।
ਦੱਸਣਯੋਗ ਹੈ ਕਿ ਸੰਦੀਪ ਸਿੰਘ ਸਿਰਫ ਇਕ ਮੋੜ ਦੂਰ ਸੀ ਜਦੋਂ ਇਹ ਹਾਦਸਾ ਹੋਇਆ। 16 ਜੁਲਾਈ ਨੂੰ ਦੋ ਸੈਮੀ-ਟ੍ਰੇਲਰਾਂ ਵਿਚਕਾਰ ਟੱਕਰ ਹੋਣ ‘ਤੇ ਦੋਨਾਂ ਡਰਾਈਵਰਾਂ ਅਤੇ ਇੱਕ ਯਾਤਰੀ ਨੂੰ ਹਸਪਤਾਲ ਲਿਜਾਇਆ ਗਿਆ ਸੀ। ਇਕ ਹਫ਼ਤੇ ਬਾਅਦ, ਸੰਦੀਪ ਨੇ ਆਪਣੀਆਂ ਗੰਭੀਰ ਸੱਟਾਂ ਕਾਰਨ ਦਮ ਤੋੜ ਦਿੱਤਾ।
ਸੰਦੀਪ 2012 ਵਿੱਚ ਸਰੀ ਆਇਆ ਸੀ, ਜਦੋਂ ਉਸਦੇ ਪਿਤਾ ਦੀ ਇੱਕ ਕਾਰ ਹਾਦਸੇ ਵਿੱਚ ਮੌਤ ਹੋ ਗਈ ਅਤੇ ਉਸਦੀ ਮਾਂ ਵੀ ਕੁਝ ਮਹੀਨਿਆਂ ਬਾਅਦ 2013 ਵਿੱਚ ਦਮ ਤੋੜ ਗਈ। ਹਾਦਸੇ ਤੋਂ ਬਾਅਦ, ਉਸਦੇ ਅੰਗ ਦਾਨ ਕੀਤੇ ਗਏ ਹਨ ਤਾਂ ਜੋ ਕਿਸੇ ਹੋਰ ਦੀ ਜਾਨ ਬਚ ਸਕੇ।
ਇਹ ਵੀ ਪਤਾ ਲੱਗਾ ਹੈ ਕਿ ਉਸਦੇ ਬਚੇ ਹੋਏ ਪਰਿਵਾਰ ਦੀ ਮਦਦ ਲਈ ਫੰਡਰੇਜ਼ਰ ਤਹਿਤ 150,000 ਡਾਲਰ ਇਕੱਠੇ ਕਰਨ ਦੇ ਟੀਚੇ ਦੇ ਨਾਲ ਸਿਰਫ 51,000 ਡਾਲਰ ਤੋਂ ਵੱਧ ਇਕੱਠਾ ਕੀਤਾ ਗਿਆ ਹੈ।
