ਸਾਲ 2022 ਦੌਰਾਨ ਕੈਨੇਡਾ ‘ਚ 437,000 ਤੋਂ ਵੱਧ ਲੋਕਾਂ ਨੂੰ ਮਿਲੀ PR

ਇਮੀਗ੍ਰੇਸ਼ਨ ਮੰਤਰੀ ਸ਼ੌਨ ਫ਼੍ਰੇਜ਼ਰ ਨੇ ਆਖਿਆ ਕਿ ਇਮੀਗ੍ਰੇਸ਼ਨ, ਰਿਫ਼ਿਊਜੀਜ਼ ਐਂਡ ਸਿਟੀਜ਼ਨਸ਼ਿਪ ਕੈਨੇਡਾ (IRCC) ਦੇ ਮੁਲਾਜ਼ਮਾਂ ਦੀ ਮਿਹਨਤ ਤੋਂ ਬਗ਼ੈਰ ਇਹ ਪ੍ਰਾਪਤੀ ਹਾਸਲ ਨਹੀਂ ਹੋ ਸਕਦੀ ਸੀ। 2022 ਵਿਚ IRCC ਨੇ ਪੀ.ਆਰ., ਟੈਂਪੋਰੇਰੀ ਰੈਜ਼ੀਡੈਂਸ ਅਤੇ ਸਿਟੀਜ਼ਨਸ਼ਿਪ ਦੀਆਂ ਤਕਰੀਬਨ 5.2 ਮਿਲੀਅਨ ਅਰਜ਼ੀਆਂ ਪ੍ਰੋਸੈਸ ਕੀਤੀਆਂ ਹਨ। ਕੈਨੇਡਾ ਦੀ ਲੇਬਰ ਫ਼ੋਰਸ ਦੇ ਵਿਕਾਸ ਵਿਚ ਇਮੀਗ੍ਰੇਸ਼ਨ ਦਾ ਯੋਗਦਾਨ ਲਗਭਗ 100 ਫ਼ੀਸਦੀ ਹੈ।

ਕੈਨੇਡਾ ਦੀ ਆਬਾਦੀ ਦਾ ਕਰੀਬਨ 75 ਫ਼ੀਸਦੀ ਵਾਧਾ ਇਮੀਗ੍ਰੇਸ਼ਨ ਤੋਂ ਹੋਇਆ ਹੈ ਅਤੇ ਉਸ ਵਿਚ ਵੀ ਮੁੱਖ ਹਿੱਸਾ ਆਰਥਿਕ ਸ਼੍ਰੇਣੀ ਹੈ। 2036 ਤੱਕ ਕੈਨੇਡਾ ਦੀ ਆਬਾਦੀ ਵਿਚੋਂ ਇਮੀਗ੍ਰੈਂਟਸ ਦੀ ਪ੍ਰਤੀਸ਼ਤਤਾ 30 % ਤੱਕ ਹੋਣ ਦਾ ਅਨੁਮਾਨ ਹੈ, ਜੋਕਿ 2011 ਵਿਚ 20.7 % ਸੀ। 2021 ਦੀ ਜਣਗਣਨਾ ਦੇ ਅਨੁਸਾਰ ਕੈਨੇਡਾ ਵਿਚ ਹਰੇਕ ਚਾਰ ਵਿਚੋਂ ਇੱਕ ਵਿਅਕਤੀ ਲੈਂਡੇਡ ਇਮੀਗ੍ਰੈਂਟ ਜਾਂ ਪਰਮਾਨੈਂਟ ਰੈਜ਼ੀਡੈਂਟ ਸੀ, ਜੋ ਕਿ ਜੀ-7 ਦੇਸ਼ਾਂ ਵਿਚ ਸਭ ਤੋਂ ਵੱਡਾ ਅਨੁਪਾਤ ਹੈ।

2016 ਤੋਂ 2021 ਦੇ ਦਰਮਿਆਨ 1.3 ਮਿਲੀਅਨ ਤੋਂ ਵੱਧ ਇਮੀਗ੍ਰੈਂਟਸ ਪੱਕੇ ਤੌਰ ‘ਤੇ ਕੈਨੇਡਾ ਵਿਚ ਸੈਟਲ ਹੋਏ ਹਨ, ਜੋਕਿ ਕੈਨੇਡੀਅਨ ਜਨਗਣਨਾ ਵਿਚ ਦਰਜ ਹੋਣ ਵਾਲੀ ਸਭ ਤੋਂ ਵੱਧ ਸੰਖਿਆ ਹੈ। ਕੈਨੇਡਾ ਵਿਚ ਕਾਮਿਆਂ ਦੀ ਘਾਟ ਦੀ ਸਮੱਸਿਆ ਨਾਲ ਨਜਿੱਠਣ ਲਈ ਇਮੀਗ੍ਰੇਸ਼ਨ ਨੂੰ ਇੱਕ ਅਹਿਮ ਹੱਲ ਵੱਜੋਂ ਦੇਖਿਆ ਜਾਂਦਾ ਹੈ। ਲੰਘੇ ਨਵੰਬਰ ਮਹੀਨੇ ਫ਼ੈਡਰਲ ਸਰਕਾਰ ਨੇ 2025 ਤੱਕ ਹਰ ਸਾਲ 500,000 ਇਮੀਗ੍ਰੈਂਟਸ ਨੂੰ ਕੈਨੇਡਾ ਸੱਦਣ ਦਾ ਟੀਚਾ ਮਿੱਥਿਆ ਹੈ।

In 2022 we welcomed 431,645 newcomers to Canada: the largest number in a single year in Canadian history. Canada has experienced one of the fastest recoveries from the pandemic with help from newcomers who continue to enrich communities across the country: https://t.co/GJGs9SvKR6 pic.twitter.com/MpTpNuyH4w

— IRCC (@CitImmCanada) January 3, 2023