ਚੀਨ ‘ਚ AI ਦੁਆਰਾ ਕੀਤੀ ਜਾ ਰਹੀਂ ਹੈ ਮ੍ਰਿਤਕਾਂ ਨਾਲ ਗੱਲਬਾਤ

ਜੋ ਕੋਈ ਧਰਤੀ ‘ਤੇ ਆਇਆ ਹੈ, ਉਸ ਨੂੰ ਇਕ ਨਾ ਇਕ ਦਿਨ ਜਾਣਾ ਹੀ ਪਵੇਗਾ। ਪਰ ਜਦੋਂ ਕੋਈ ਸਾਡਾ ਨਜ਼ਦੀਕੀ ਗੁਜ਼ਰ ਜਾਂਦਾ ਹੈ ਤਾਂ ਉਸਦੀ ਕਮੀ ਕਦੇ ਵੀ ਭਰੀ ਨਹੀਂ ਜਾ ਸਕਦੀ।ਚੀਨ ਦੇ ਲੋਕਾਂ ਨੇ ਆਪਣੇ ਪਿਆਰਿਆਂ ਨੂੰ ਯਾਦ ਕਰਨ ਦਾ ਅਨੋਖਾ ਤਰੀਕਾ ਕੱਢਿਆ ਹੈ।  AI ਦੀ ਮਦਦ ਨਾਲ ਉਹ ਆਪਣੇ ਮਰੇ ਹੋਏ ਪਿਆਰਿਆਂ ਦੇ ਜਿਉਂਦੇ ਅਵਤਾਰ ਬਣਾ ਰਹੇ ਹਨ। ਘੰਟਿਆਂ ਬੱਧੀ ਉਨ੍ਹਾਂ ਨਾਲ ਗੱਲ ਕਰੋ। ਆਪਣੇ ਵਿਚਾਰ ਉਹਨਾਂ ਨਾਲ ਸਾਂਝੇ ਕਰੋ। ਜਿਵੇਂ ਉਹ ਜਿਉਂਦਾ ਹੁੰਦਾ ਤਾਂ ਅਸੀਂ ਉਸ ਨਾਲ ਗੱਲ ਕਰਦੇ। ਮੁਰਦਿਆਂ ਨੂੰ ‘ਜੀਵਤ’ ਕਰਨ ਦਾ ਇਹ ਇਕ ਅਨੋਖਾ ਤਰੀਕਾ ਹੈ, ਜੋ ਕਾਫੀ ਮਸ਼ਹੂਰ ਹੋ ਰਿਹਾ ਹੈ।

ਸਾਊਥ ਚਾਈਨਾ ਮਾਰਨਿੰਗ ਪੋਸਟ ਦੀ ਰਿਪੋਰਟ ਮੁਤਾਬਕ ਇਸ ਨੂੰ ਚੀਨ ‘ਚ ‘ਘੋਸਟ ਬੋਟ’ ਦੇ ਨਾਂ ਨਾਲ ਜਾਣਿਆ ਜਾ ਰਿਹਾ ਹੈ। ਕੋਈ ਆਪਣੀ ਗਰਲਫਰੈਂਡ ਲਈ AI ਬਣਵਾ ਰਿਹਾ ਹੈ ਅਤੇ ਕੋਈ ਆਪਣੀ ਪਤਨੀ ਲਈ। ਕੁਝ ਆਪਣੇ ਪੁੱਤਰ ਲਈ ਤੇ ਕੁਝ ਆਪਣੇ ਬਜ਼ੁਰਗ ਮਾਪਿਆਂ ਲਈ। ਲੋਕ ਇਸ ‘ਤੇ 5000 ਤੋਂ 100000 ਯੂਆਨ ਖਰਚ ਕਰ ਰਹੇ ਹਨ। ਕਈ ਲੋਕ ਇਸ ‘ਤੇ ਲੱਖਾਂ ਰੁਪਏ ਪਾਣੀ ਵਾਂਗ ਖਰਚ ਰਹੇ ਹਨ। AI ਫਰਮ ਸੁਪਰ ਬ੍ਰੇਨ ਦੇ ਸੰਸਥਾਪਕ ਝਾਂਗ ਜ਼ੇਵੇਈ ਨੇ ਕਿਹਾ, ਤਕਨਾਲੋਜੀ ਸਾਨੂੰ ਆਪਣੇ ਪਿਆਰਿਆਂ ਦੇ ਨੇੜੇ ਮਹਿਸੂਸ ਕਰਨ ਦਾ ਮੌਕਾ ਦੇ ਰਹੀ ਹੈ। ਅਸੀਂ ਸਿਰਫ਼ 30 ਸਕਿੰਟਾਂ ਦੀ ਆਡੀਓ ਵਿਜ਼ੁਅਲ ਸਮੱਗਰੀ ਬਣਾਉਂਦੇ ਹਾਂ ਜੋ ਹਜ਼ਾਰਾਂ ਪਰਿਵਾਰਾਂ ਨੂੰ ਆਪਣੇ ਅਜ਼ੀਜ਼ਾਂ ਨੂੰ ਡਿਜੀਟਲ ਰੂਪ ਵਿੱਚ ਮੁੜ ਸੁਰਜੀਤ ਕਰਨ ਵਿੱਚ ਮਦਦ ਕਰਦੀ ਹੈ। ਸਾਡੇ ਵੱਲੋਂ ਹੁਣ ਤੱਕ ਬਣਾਈ ਗਈ ਸਾਰੀ ਸਮੱਗਰੀ ਵਿੱਚੋਂ, ਅੱਧੇ ਤੋਂ ਵੱਧ ਗਾਹਕ ਬਜ਼ੁਰਗ ਮਾਪੇ ਹਨ ਜਿਨ੍ਹਾਂ ਨੇ ਆਪਣੇ ਬੱਚੇ ਗੁਆ ਦਿੱਤੇ ਹਨ।

AI ਨੂੰ ਇਸ ਤਰ੍ਹਾਂ ਤਿਆਰ ਕੀਤਾ ਜਾਂਦਾ ਹੈ
ਆਖ਼ਰਕਾਰ, ਇਹ ਕਿਵੇਂ ਹੁੰਦਾ ਹੈ? ਇਸ ‘ਤੇ ਝਾਂਗ ਨੇ ਕਿਹਾ, ਸਾਡੀ ਟੀਮ ਤਿੰਨ ਤਰੀਕਿਆਂ ਨਾਲ ਸੇਵਾਵਾਂ ਪ੍ਰਦਾਨ ਕਰਦੀ ਹੈ। AI Healing ਇੱਕ ਚੈਟਬਾਕਸ ਬਣਾਉਣ ਲਈ ਆਵਾਜ਼ ਨੂੰ ਕਲੋਨ ਕਰਦਾ ਹੈ। ਡਿਜੀਟਲ ਪੋਰਟਰੇਟ ਇੱਕ 3D ਡਿਜੀਟਲ ਚਿੱਤਰ ਬਣਾਉਂਦਾ ਹੈ ਅਤੇ ਵਧੀਆ ਕੰਟੇਂਟ ਵੀ ਬਣਾਉਂਦਾ ਹੈ। ਜਿਸ ਵਿੱਚ ਉਸ ਵਿਅਕਤੀ ਦੀ ਪ੍ਰੋਫਾਈਲ ਦਰਜ ਕੀਤੀ ਜਾਂਦੀ ਹੈ। ਟੀਮ ਨੇ ਹੁਣ ਤੱਕ 600 ਤੋਂ ਵੱਧ ਪਰਿਵਾਰਾਂ ਲਈ ਅਜਿਹੀ ਸਮੱਗਰੀ ਤਿਆਰ ਕੀਤੀ ਹੈ। ਇਸ ਦੇ ਲਈ ਮ੍ਰਿਤਕ ਦੀ ਫੋਟੋ, ਵੀਡੀਓ ਅਤੇ ਆਡੀਓ ਰਿਕਾਰਡਿੰਗ ਦੀ ਲੋੜ ਹੁੰਦੀ ਹੈ। ਸਾਡੇ ਕੋਲ ਜਿੰਨੀ ਜ਼ਿਆਦਾ ਸਮੱਗਰੀ ਹੋਵੇਗੀ, ਕਲੋਨਿੰਗ ਪ੍ਰਭਾਵ ਓਨਾ ਹੀ ਵਧੀਆ ਹੋਵੇਗਾ।

ਜਦੋਂ ਇਹ ਦੇਖ ਕੇ ਬੀਮਾਰ ਮਾਂ ਠੀਕ ਹੋ ਗਈ
ਝਾਂਗ ਨੇ ਇਕ ਗਾਹਕ ਦੀ ਉਦਾਹਰਣ ਦਿੰਦੇ ਹੋਏ ਦੱਸਿਆ- ਵੂ ਉਪਨਾਮ ਵਾਲੇ ਇਸ ਵਿਅਕਤੀ ਦੇ ਪੁੱਤਰ ਦੀ 2022 ਵਿੱਚ ਦਿਲ ਦਾ ਦੌਰਾ ਪੈਣ ਕਾਰਨ ਮੌਤ ਹੋ ਗਈ ਸੀ। ਉਸ ਸਮੇਂ ਉਹ ਬਰਤਾਨੀਆ ਵਿੱਚ ਪੜ੍ਹ ਰਿਹਾ ਸੀ ਅਤੇ ਸਿਰਫ਼ 22 ਸਾਲਾਂ ਦਾ ਸੀ। ਇਸ ਤੋਂ ਬਾਅਦ ਉਸ ਦੀ ਪਤਨੀ ਬੀਮਾਰ ਰਹਿਣ ਲੱਗੀ। ਇੱਥੋਂ ਤੱਕ ਕਿ ਡਾਕਟਰ ਵੀ ਉਸ ਦਾ ਇਲਾਜ ਨਹੀਂ ਲੱਭ ਸਕੇ। ਫਿਰ ਉਹ ਸਾਡੇ ਕੋਲ ਆਏ। ਅਸੀਂ ਉਸ ਦੇ ਪੁੱਤਰ ਦੀ ਤਸਵੀਰ ਅਤੇ ਆਵਾਜ਼ ਦੀ ਨਕਲ ਕਰਕੇ ਇੱਕ AI ਮਾਡਲ ਬਣਾਇਆ, ਨਤੀਜਾ ਹੈਰਾਨ ਕਰਨ ਵਾਲਾ ਸੀ।

ਉਸਦੀ ਪਤਨੀ ਕੁਝ ਦਿਨਾਂ ਵਿੱਚ ਠੀਕ ਹੋ ਗਈ। ਅਸੀਂ ਹੁਣੇ ਹੀ ਇਸ ਵਿੱਚ ਇਹ ਆਵਾਜ਼ ਸ਼ਾਮਲ ਕੀਤੀ ਸੀ, ਅਲਵਿਦਾ, ਮੇਰੇ ਪਿਆਰੇ ਮੰਮੀ ਅਤੇ ਡੈਡੀ। ਮੈਨੂੰ ਉਮੀਦ ਹੈ ਕਿ ਮੈਂ ਹਰ ਸਮੇਂ ਤੁਹਾਡੇ ਨਾਲ ਰਹਾਂਗਾ, ਅਤੇ ਤੁਹਾਨੂੰ ਨਿੱਘ ਅਤੇ ਪਿਆਰ ਦੇ ਸਕਾਂਗਾ। ਇਸ ਦੇ ਨਾਲ ਹੀ ਵੂ ਨੇ ਕਿਹਾ, ਮੌਤ ਪਿਆਰ ਦਾ ਅੰਤ ਨਹੀਂ ਹੈ। ਆਓ ਮੈਟਾਵਰਸ ਵਿੱਚ ਦੁਬਾਰਾ ਇੱਕਜੁੱਟ ਹੋਈਏ।