ਜਸਟਿਨ ਟਰੂਡੋ ਦੇ ਖਿਲਾਫ ਬਗਾਵਤ ਦੇ ਮਾਹੌਲ ਵਿਚ, ਲਿਬਰਲ ਪਾਰਟੀ ਨੇ ਪ੍ਰਚਾਰ ਮੁਹਿੰਮ ਲਈ ਨਵੇਂ ਮੁਖੀ ਦੀ ਨਿਯੁਕਤੀ ਕੀਤੀ
ਕੈਨੇਡਾ ਦੀ ਲਿਬਰਲ ਪਾਰਟੀ ਨੇ, ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਵਿਰੁੱਧ ਉਭਰ ਰਹੀ ਬਗਾਵਤ ਦੇ ਮਾਹੌਲ ਵਿਚ, ਪ੍ਰਚਾਰ ਟੀਮ ਦੇ ਨਵੇਂ ਮੁਖੀ ਵਜੋਂ ਐਂਡਰਿਊ ਬੈਵਨ ਦੀ ਨਿਯੁਕਤੀ ਕੀਤੀ ਹੈ। ਐਂਡਰਿਊ ਬੈਵਨ ਨੇ ਜੈਰੇਮੀ ਬਰੌਡਹਰਸਟ ਦੀ ਜਗ੍ਹਾ ਲਈ ਹੈ, ਜਿਨ੍ਹਾਂ ਨੇ ਮੋਂਟਰੀਅਲ ਦੀ ਜ਼ਿਮਨੀ ਚੋਣ ਤੋਂ ਥੋੜ੍ਹਾ ਪਹਿਲਾਂ ਅਸਤੀਫ਼ਾ ਦੇ ਦਿੱਤਾ ਸੀ। ਬੈਵਨ ਪਹਿਲਾਂ ਵੀ ਟਰੂਡੋ ਦੇ ਨਿੱਜੀ ਸਲਾਹਕਾਰ ਰਹਿ ਚੁੱਕੇ ਹਨ ਅਤੇ ਉਪ ਪ੍ਰਧਾਨ ਮੰਤਰੀ ਕ੍ਰਿਸਟੀਆ ਫਰੀਲੈਂਡ ਦੇ ਚੀਫ਼ ਆਫ਼ ਸਟਾਫ਼ ਵਜੋਂ ਵੀ ਕੰਮ ਕਰ ਚੁੱਕੇ ਹਨ।
ਸਿਆਸੀ ਮਾਹਰਾਂ ਦਾ ਕਹਿਣਾ ਹੈ ਕਿ ਐਂਡਰਿਊ ਬੈਵਨ ਦੀ ਨਿਯੁਕਤੀ ਪਹਿਲਾਂ ਹੀ ਹੋ ਸਕਦੀ ਸੀ, ਪਰ ਲਗਭਗ ਇੱਕ ਮਹੀਨੇ ਲਈ ਇਹ ਅਹੁਦਾ ਖਾਲੀ ਰਿਹਾ। ਇਸੇ ਦੌਰਾਨ, ਲਿਬਰਲ ਪਾਰਟੀ ਦੇ 30 ਐਮ.ਪੀਜ਼ ਵੱਲੋਂ ਟਰੂਡੋ ਦੇ ਵਿਰੁੱਧ ਬਗਾਵਤੀ ਰੁਖ ਦਾ ਖੁਲਾਸਾ ਹੋਇਆ, ਜਿਸ ਕਾਰਨ ਸਰਕਾਰ ਨੂੰ ਤੁਰੰਤ ਕਾਰਵਾਈ ਕਰਨੀ ਪਈ। ਬੈਵਨ ਦੀ ਨਿਯੁਕਤੀ ਇਸ ਸੰਕਟ ਨਾਲ ਨਜਿੱਠਣ ਲਈ ਕੀਤੀ ਗਈ ਹੈ।
ਲਿਬਰਲ ਪਾਰਟੀ ਦੇ ਪ੍ਰਚਾਰ ਮੁਹਿੰਮ ਵਿੱਚ ਵੱਧਦੇ ਸੰਕਟ ਨੂੰ ਸੰਭਾਲਣ ਲਈ ਬੈਵਨ ਦੇ ਮੁੱਖੀ ਬਣਨ ਨਾਲ ਕੁਝ ਸੁਧਾਰ ਦੀ ਉਮੀਦ ਜਤਾਈ ਜਾ ਰਹੀ ਹੈ। ਟੋਰਾਂਟੋ ਸੇਂਟ ਪੌਲ ਸੀਟ ’ਤੇ ਲਿਬਰਲ ਪਾਰਟੀ ਦੀ ਹਾਰ ਤੋਂ ਬਾਅਦ ਕਈ ਵੱਡੇ ਅਸਤੀਫ਼ਿਆਂ ਦੀ ਉਮੀਦ ਸੀ, ਪਰ ਹਾਲਾਤ ਸਮੇਂ ਸਮੇਤ ਠੀਕ ਹੋ ਗਏ ਸਨ। ਹਾਲਾਂਕਿ, ਮੋਂਟਰੀਅਲ ਦੀ ਜ਼ਿਮਨੀ ਚੋਣ ਨੇ ਮੁੜ ਸਿਆਸੀ ਹਲਚਲ ਪੈਦਾ ਕਰ ਦਿੱਤੀ ਹੈ।
ਸਿਆਸੀ ਜਾਣਕਾਰ ਮੰਨ ਰਹੇ ਹਨ ਕਿ ਟਰੂਡੋ ਦੇ ਵਿਰੁੱਧ ਬਗਾਵਤ ਪਿਛਲੇ ਤਿੰਨ ਮਹੀਨਿਆਂ ਦੇ ਮੁਕਾਬਲੇ ਕਾਫੀ ਤੇਜ਼ ਹੋ ਗਈ ਹੈ। ਬਾਗੀ ਧੜਾ ਟਰੂਡੋ ਦੇ ਅਸਤੀਫ਼ੇ ਤੋਂ ਘੱਟ ਕਿਸੇ ਗੱਲ ਨਾਲ ਖੁਸ਼ ਨਹੀਂ, ਅਤੇ ਉਨ੍ਹਾਂ ਦੀਆਂ ਸਰਗਰਮੀਆਂ ਟਰੂਡੋ ਦੀ ਗੈਰਹਾਜ਼ਰੀ ਵਿੱਚ ਹੋਰ ਵਧ ਗਈਆਂ ਹਨ। ਪਿਛਲੇ ਹਫਤੇ ਟਰੂਡੋ ਅਤੇ ਉਨ੍ਹਾਂ ਦੀ ਚੀਫ਼ ਆਫ਼ ਸਟਾਫ਼ ਕੈਟੀ ਟੈਲਫੋਰਡ ਆਸੀਅਨ ਸੰਮੇਲਨ ਲਈ ਲਾਓਸ ਗਏ ਹੋਏ ਸਨ, ਜਿਸ ਦੌਰਾਨ ਬਾਗੀਆਂ ਨੇ ਆਪਣਾ ਦਬਾਅ ਵਧਾਉਣਾ ਜਾਰੀ ਰੱਖਿਆ।
ਇਸ ਸਥਿਤੀ ਵਿਚ, ਕੁਝ ਐਮ.ਪੀਜ਼ ਦਾ ਕਹਿਣਾ ਹੈ ਕਿ ਕੈਨੇਡਾ ਦੀ ਸਿਆਸਤ ਵਿੱਚ ਕਿਸੇ ਵੀ ਵੇਲੇ ਕੁਝ ਵੀ ਹੋ ਸਕਦਾ ਹੈ, ਅਤੇ ਚੋਣਾਂ ਦਾ ਐਲਾਨ ਵੀ ਅਚਾਨਕ ਹੋ ਸਕਦਾ ਹੈ।
