ਕੈਨੇਡਾ ਵਿੱਚ ਹਾਊਸਿੰਗ ਸੰਕਟ ਅਤੇ ਪ੍ਰਵਾਸੀਆਂ ਲਈ ਲੋਕਾਂ ਦੀਆਂ ਵੱਖ-ਵੱਖ ਰਾਏ

ਕੈਨੇਡਾ ਵਿੱਚ ਜਿਥੇ ਹਾਊਸਿੰਗ ਸੰਕਟ ਅਤੇ ਮਹਿੰਗਾਈ ਵਧ ਰਹੀ ਹੈ, ਉਥੇ ਹੀ ਲੋਕਾਂ ਵਿਚ ਪ੍ਰਵਾਸੀਆਂ ਲਈ ਵੱਖ-ਵੱਖ ਰਾਏ ਸਾਹਮਣੇ ਆ ਰਹੀਆਂ ਹਨ। ਇੱਕ ਨਵੇਂ ਸਰਵੇਖਣ ਦੇ ਨਤੀਜੇ ਵੱਖ-ਵੱਖ ਵਿਚਾਰ ਪੇਸ਼ ਕਰਦੇ ਹਨ। ਟੋਰਾਂਟੋ, ਵੈਨਕੂਵਰ, ਐਡਮਿੰਟਨ ਅਤੇ ਕੈਲਗਰੀ ਦੇ ਵੱਡੇ ਸ਼ਹਿਰਾਂ ਵਿੱਚੋਂ 45% ਲੋਕਾਂ ਨੇ ਕਿਹਾ ਹੈ ਕਿ ਕੈਨੇਡਾ ਨੂੰ ਨਵੇਂ ਪ੍ਰਵਾਸੀਆਂ ਲਈ ਆਪਣੇ ਦਰਵਾਜ਼ੇ ਬੰਦ ਨਹੀਂ ਕਰਨੇ ਚਾਹੀਦੇ, ਪਰ ਇਹ ਗਿਣਤੀ ਵਧਾਉਣ ਦੀ ਬਜਾਏ ਘਟਾਈ ਜਾ ਸਕਦੀ ਹੈ। ਇਸੇ ਵੇਲੇ, 22% ਲੋਕਾਂ ਦਾ ਕਹਿਣਾ ਸੀ ਕਿ ਪ੍ਰਵਾਸੀਆਂ ਦੀ ਆਮਦ ਪੂਰੀ ਤਰ੍ਹਾਂ ਰੋਕਣੀ ਚਾਹੀਦੀ ਹੈ।

ਵੈਨਕੂਵਰ ਦੇ 54% ਲੋਕਾਂ ਨੇ ਕਿਹਾ ਕਿ ਪ੍ਰਵਾਸੀਆਂ ਦੀ ਆਮਦ ਨਾਲ ਉਨ੍ਹਾਂ ਦੇ ਸ਼ਹਿਰ ਨੂੰ ਲਾਭ ਮਿਲਿਆ ਹੈ, ਜਦੋਂ ਕਿ ਟੋਰਾਂਟੋ ਵਿੱਚ ਇਹ ਅੰਕੜਾ 49% ਹੈ। ਦੂਜੇ ਪਾਸੇ, ਕੁਝ ਲੋਕਾਂ ਦਾ ਕਹਿਣਾ ਹੈ ਕਿ ਪ੍ਰਵਾਸੀਆਂ ਦੀ ਵਧ ਰਹੀ ਗਿਣਤੀ ਨਾਲ ਸਥਾਨਕ ਸਹੂਲਤਾਂ ’ਤੇ ਦਬਾਅ ਪੈ ਰਿਹਾ ਹੈ।

ਪ੍ਰਵਾਸੀਆਂ ਦੀਆਂ ਤਰਜੀਹਾਂ ‘ਤੇ ਲੋਕਾਂ ਦੀ ਰਾਏ: ਸਰਵੇਖਣ ਦੌਰਾਨ ਜਦੋਂ ਇਹ ਪੁੱਛਿਆ ਗਿਆ ਕਿ ਕਿਹੜੀ ਪ੍ਰਵਾਸੀ ਸਮੂਹ ਨੂੰ ਤਰਜੀਹ ਮਿਲਣੀ ਚਾਹੀਦੀ ਹੈ, ਤਾਂ 49% ਲੋਕਾਂ ਨੇ ਕੌਮਾਂਤਰੀ ਵਿਦਿਆਰਥੀਆਂ ਨੂੰ ਪਹਿਲਾ ਸਥਾਨ ਦਿੱਤਾ। ਦੂਜੇ ਨੰਬਰ ’ਤੇ ਰਫਿਊਜੀਆਂ ਅਤੇ ਤੀਜੇ ਸਥਾਨ ‘ਤੇ ਟੈਂਪਰੇਰੀ ਫੌਰਨ ਵਰਕਰਜ਼ ਨੂੰ ਰੱਖਿਆ ਗਿਆ। ਸਪੌਂਸਰਡ ਫੈਮਿਲੀ ਮੈਂਬਰਜ਼ ਨੇ 45% ਲੋਕਾਂ ਦੀ ਹਮਾਇਤ ਨਾਲ ਚੌਥਾ ਸਥਾਨ ਹਾਸਿਲ ਕੀਤਾ, ਜਦਕਿ ਆਰਥਿਕ ਪ੍ਰਵਾਸੀ ਪੰਜਵੇਂ ਸਥਾਨ ’ਤੇ ਰਹੇ।

ਇਸ ਦੇ ਬਾਵਜੂਦ, ਕੁਝ ਲੋਕ ਅਜਿਹੇ ਵੀ ਸਨ ਜੋ ਸਪੌਂਸਰਡ ਫੈਮਿਲੀज़ ਨੂੰ ਪਹਿਲੀ ਤਰਜੀਹ ਦੇਣਾ ਚਾਹੁੰਦੇ ਸਨ, ਜਦਕਿ ਆਰਥਿਕ ਪ੍ਰਵਾਸੀ ਅਤੇ ਵਿਦਿਆਰਥੀਆਂ ਨੂੰ ਦੂਜੇ ਸਥਾਨ ’ਤੇ ਰੱਖਿਆ ਗਿਆ। 10% ਲੋਕਾਂ ਨੇ ਕਿਹਾ ਕਿ ਕੈਨੇਡਾ ਵਿਚ ਪ੍ਰਵਾਸੀਆਂ ਦੀ ਗਿਣਤੀ ਵਧਾਈ ਜਾ ਸਕਦੀ ਹੈ।

ਰਫਿਊਜੀਜ਼ ਅਤੇ ਟੈਂਪਰੇਰੀ ਫੌਰਨ ਵਰਕਰਜ਼ ਦੇ ਵਿਰੋਧ: ਸਰਵੇਖਣ ਦੌਰਾਨ ਕੁਝ ਲੋਕਾਂ ਨੇ ਰਫਿਊਜੀਜ਼ ਅਤੇ ਟੈਂਪਰੇਰੀ ਫੌਰਨ ਵਰਕਰਜ਼ ਦੀਆਂ ਪਾਲਿਸੀਆਂ ’ਤੇ ਵਿਰੋਧ ਦਰਸਾਇਆ। 22% ਲੋਕਾਂ ਨੇ ਕਿਹਾ ਕਿ ਰਫਿਊਜੀਆਂ ਦੀ ਆਮਦ ਰੋਕਣੀ ਚਾਹੀਦੀ ਹੈ, ਜਦਕਿ 28% ਨੇ ਟੈਂਪਰੇਰੀ ਫੌਰਨ ਵਰਕਰਜ਼ ਦੇ ਵਿਰੋਧ ਵਿਚ ਆਪਣੀ ਰਾਏ ਦਿੱਤੀ। ਦੂਜੇ ਪਾਸੇ, ਕੌਮਾਂਤਰੀ ਵਿਦਿਆਰਥੀਆਂ ਨੂੰ ਵਿਰੋਧ ਸਬੰਧੀ ਸਭ ਤੋਂ ਘੱਟ ਅੰਕੜਾ ਮਿਲਿਆ।

ਇਹ ਦਰਸਾਉਂਦਾ ਹੈ ਕਿ ਕੈਨੇਡਾ ਦੀ ਇਮਿਗ੍ਰੇਸ਼ਨ ਪਾਲਿਸੀ ਵਿੱਚ ਵੱਖ-ਵੱਖ ਸਮੂਹਾਂ ਲਈ ਵੱਖ-ਵੱਖ ਤਰਜੀਹਾਂ ਹਨ। ਨਵੰਬਰ ਤੋਂ, ਸਟੱਡੀ ਵੀਜ਼ਿਆਂ ਲਈ ਨਵੇਂ ਨਿਯਮ ਲਾਗੂ ਹੋਣ ਜਾ ਰਹੇ ਹਨ, ਜਦਕਿ 26 ਸਤੰਬਰ ਤੋਂ ਟੈਂਪਰੇਰੀ ਫੌਰਨ ਵਰਕਰਜ਼ ਲਈ ਨਵੇਂ ਨਿਯਮ ਲਾਗੂ ਹੋ ਚੁੱਕੇ ਹਨ, ਜਿਨ੍ਹਾਂ ਅਨੁਸਾਰ ਇੱਕ ਕਾਰੋਬਾਰੀ 10% ਤੋਂ ਵੱਧ ਟੈਂਪਰੇਰੀ ਵਰਕਰਜ਼ ਨਹੀਂ ਰੱਖ ਸਕਦਾ।