ਫ੍ਰੀਲੈਂਡ ਦੇ ਅਸਤੀਫੇ ਨੇ ਬਾਜ਼ਾਰਾਂ ਨੂੰ ਹਿਲਾਇਆ, ਲੂਨੀ ਮਹਾਂਮਾਰੀ ਦੀ ਸ਼ੁਰੂਆਤ ਤੋਂ ਬਾਅਦ ਪਹਿਲੀ ਵਾਰ 70 ਸੈਂਟ ਯੂਐਸ ਤੋਂ ਹੇਠਾਂ ਡਿਗਿਆ
ਇਸ ਸਾਲ ਪਹਿਲਾਂ ਹੀ ਕਮਜ਼ੋਰ ਹੋ ਰਹੇ ਕੈਨੇਡੀਅਨ ਡਾਲਰ ਨੂੰ ਇੱਕ ਹੋਰ ਝਟਕਾ ਲੱਗਿਆ ਜਦੋਂ ਵਿੱਤ ਮੰਤਰੀ ਕ੍ਰਿਸਟੀਆ ਫਰੀਲੈਂਡ ਨੇ ਅਚਾਨਕ ਆਪਣੇ ਅਹੁਦੇ ਤੋਂ ਅਸਤੀਫ਼ਾ ਦੇ ਦਿੱਤਾ। ਇਸ ਹਫ਼ਤੇ ਕੈਨੇਡੀਅਨ ਡਾਲਰ ਪਹਿਲੀ ਵਾਰ 70 ਸੈਂਟ (ਅਮਰੀਕੀ) ਤੋਂ ਘਟ ਗਿਆ ਹੈ, ਫਰੀਲੈਂਡ ਦੇ ਅਸਤੀਫ਼ੇ ਨਾਲ ਨਾ ਸਿਰਫ਼ ਸਰਕਾਰ ਪਰੇਸ਼ਾਨ ਹੋਈ ਹੈ, ਪਰ ਵਿਰੋਧੀਆਂ ਨੇ – ਇੱਥੋਂ ਤੱਕ ਕਿ ਕੁਝ ਲਿਬਰਲ ਮੈਂਬਰਾਂ ਨੇ ਵੀ – ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਅਹੁਦਾ ਛੱਡਣ ਦੀ ਮੰਗ ਕੀਤੀ ਹੈ।
ਸਕੋਸ਼ੀਆਬੈਂਕ ਦੇ ਮੁੱਖ ਮੁਦਰਾ ਰਣਨੀਤਿਕਾਰ ਸ਼ਾਨ ਆਸਬੋਰਨ ਨੇ ਕਿਹਾ, “ਬਾਜ਼ਾਰ ਅਣਸ਼ਚਿਤਤਾ ਨੂੰ ਬਿਲਕੁਲ ਪਸੰਦ ਨਹੀਂ ਕਰਦੇ। ਇਹ ਸਮਾਂ ਪਹਿਲਾਂ ਹੀ ਕੈਨੇਡੀਅਨ ਡਾਲਰ ਲਈ ਚੁਣੌਤੀਪੂਰਨ ਸੀ, ਪਰ ਹੁਣ ਇਹ ਹੋਰ ਵੀ ਮੁਸ਼ਕਲ ਬਣ ਗਿਆ ਹੈ।”
ਫਰੀਲੈਂਡ ਦੇ ਅਸਤੀਫ਼ੇ ਤੋਂ ਬਾਅਦ, ਬੁੱਧਵਾਰ ਨੂੰ ਅਮਰੀਕੀ ਫੈਡਰਲ ਰਿਜ਼ਰਵ ਵੱਲੋਂ ਵਿਆਜ਼ ਦਰਾਂ ਵਿੱਚ 25 ਅੰਕਾਂ ਦੀ ਕਟੌਤੀ ਅਤੇ 2025 ਵਿੱਚ ਸਿਰਫ਼ ਦੋ ਵਾਰ ਵਿਆਜ਼ ਦਰਾਂ ਵਿੱਚ ਕਟੌਤੀ ਕਰਨ ਦੇ ਸੰਕੇਤ ਦੇ ਨਾਲ ਹੀ ਕੈਨੇਡੀਅਨ ਡਾਲਰ ਨੂੰ ਹੋਰ ਝਟਕਾ ਲੱਗਾ।
2024 ਦੀ ਸ਼ੁਰੂਆਤ ਵਿੱਚ ਕੈਨੇਡੀਅਨ ਡਾਲਰ 75.10 ਸੈਂਟ (ਅਮਰੀਕੀ) ਸੀ, ਪਰ ਜੂਨ ਵਿੱਚ ਬੈਂਕ ਆਫ਼ ਕੈਨੇਡਾ ਵੱਲੋਂ ਵਿਆਜ਼ ਦਰਾਂ ਨੂੰ ਘਟਾਉਣ ਦੇ ਬਾਅਦ ਇਹ ਕਮਜ਼ੋਰ ਹੋਣਾ ਸ਼ੁਰੂ ਹੋ ਗਿਆ। ਇਸ ਹਫ਼ਤੇ ਇਹ 69.27 ਸੈਂਟ (ਅਮਰੀਕੀ) ਤੱਕ ਡਿੱਗ ਗਿਆ।
ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਕੈਨੇਡੀਅਨ ਨਿਰਯਾਤ ’ਤੇ 25 ਪ੍ਰਤੀਸ਼ਤ ਸ਼ੁਲਕ ਲਗਾਉਣ ਦੀ ਧਮਕੀ ਨੇ ਡਾਲਰ ਦੇ ਹਾਲਾਤ ਨੂੰ ਹੋਰ ਖਰਾਬ ਕੀਤਾ। ਆਸਬੋਰਨ ਦੇ ਮਤਾਬਕ, “ਖੁੱਲ੍ਹੀਆਂ ਅਰਥਵਿਵਸਥਾਵਾਂ ਜੋ ਵਪਾਰ ’ਤੇ ਨਿਰਭਰ ਹਨ, ਉਨ੍ਹਾਂ ਲਈ ਵਪਾਰਕ ਯੁੱਧ ਹਮੇਸ਼ਾ ਨੁਕਸਾਨਦਾਈ ਹੁੰਦੇ ਹਨ।”
ਬੈਂਕ ਆਫ਼ ਕੈਨੇਡਾ ਨੇ ਆਪਣੀ ਮਹੱਤਵਪੂਰਨ ਰਾਤੋ-ਰਾਤ ਦਰ ਨੂੰ ਪੰਜ ਵਾਰ ਘਟਾ ਕੇ 3.25 ਪ੍ਰਤੀਸ਼ਤ ਕਰ ਦਿੱਤਾ, ਜਦਕਿ ਅਮਰੀਕਾ ਦੀ ਫੈਡਰਲ ਰਿਜ਼ਰਵ ਨੇ ਇਸ ਨੂੰ 4.25-4.5 ਪ੍ਰਤੀਸ਼ਤ ਦੇ ਦਰਮਿਆਨ ਰੱਖਿਆ। ਇਸ ਦੇ ਕਾਰਨ ਕੈਨੇਡੀਅਨ ਅਤੇ ਅਮਰੀਕੀ ਦਰਾਂ ਵਿਚਾਲੇ ਫਰਕ ਵੱਧ ਰਿਹਾ ਹੈ, ਜਿਸ ਨਾਲ ਕੈਨੇਡੀਅਨ ਡਾਲਰ ’ਤੇ ਦਬਾਅ ਬਣਿਆ ਹੈ।
ਰਾਏਲ ਬੈਂਕ ਆਫ਼ ਕੈਨੇਡਾ ਦੇ ਅਨੁਸਾਰ, ਵਿਆਜ਼ ਦਰਾਂ ਵਿੱਚ ਹੋਰ ਕਟੌਤੀ ਕੀਤੀ ਜਾ ਸਕਦੀ ਹੈ, ਜਿਸ ਨਾਲ ਇਹ ਅਗਲੇ ਸਾਲ ਜੁਲਾਈ ਤੱਕ ਦੋ ਪ੍ਰਤੀਸ਼ਤ ਤੱਕ ਆ ਸਕਦੀ ਹੈ। ਇਮੀਗ੍ਰੇਸ਼ਨ ਵਿੱਚ ਗਿਰਾਵਟ ਅਤੇ ਵਪਾਰਕ ਅਣਸ਼ਚਿਤਾ ਦੇ ਕਾਰਨ ਅਰਥਵਿਵਸਥਾ ਉੱਤੇ ਹੋਰ ਬੁਰਾ ਅਸਰ ਪੈ ਸਕਦਾ ਹੈ।
ਇਕ ਗੰਭੀਰ ਹਾਲਾਤ ਵਿੱਚ, ਇਹ ਸਪੱਸ਼ਟ ਹੈ ਕਿ ਅਸਤੀਫ਼ਾ ਅਤੇ ਅਰਥਕ ਸਥਿਤੀਆਂ ਨੇ ਕੈਨੇਡੀਅਨ ਡਾਲਰ ਨੂੰ ਇੱਕ ਗੰਭੀਰ ਸੰਕਟ ਵਿੱਚ ਧਕੇ ਦਿੱਤਾ ਹੈ।
