ਟਵਿੱਟਰ ਤੋਂ ਬਾਅਦ ਹੁਣ ਮੈਟਾ ਨੇ ਵੀ ਕੀਤੀ 11,000 ਕਰਮਚਾਰੀਆਂ ਦੀ ਛਾਂਟੀ
ਟਵਿੱਟਰ ਤੋਂ ਬਾਅਦ ਹੁਣ ਮੈਟਾ ਵੱਲੋਂ ਵੀ ਆਪਣੇ 11 ਹਜ਼ਾਰ ਕਰਮਚਾਰੀਆਂ ਦੀ ਛਾਂਟੀ ਕਰਨ ਦਾ ਐਲਾਨ ਕੀਤਾ ਗਿਆ ਹੈ , ਜੋ ਕਿ ਕੁੱਲ ਕਰਮਚਾਰੀਆਂ ਦਾ ਲਗਭਗ 13 ਪ੍ਰਤੀਸ਼ਤ ਹੈ।ਪਿਛਲੇ ਹਫ਼ਤੇ, ਟਵਿੱਟਰ ਨੇ ਆਪਣੇ 7,500 ਕਰਮਚਾਰੀਆਂ ਵਿੱਚੋਂ ਅੱਧੇ ਕਰਮਚਾਰੀਆਂ ਨੂੰ ਨੌਕਰੀ ਤੋਂ ਕੱਢ ਦਿੱਤਾ ਸੀ।ਐਲੋਨ ਮਸਕ ਨੇ ਆਪਣੇ ਟਵਿੱਟਰ ਦੀ ਮਲਕੀਅਤ ਸੰਭਾਲਣ ਤੋਂ ਬਾਅਦ ਕੰਪਨੀ ਦੀ ਆਮਦਨ ਵਿਚ ਹੋਈ ਭਾਰੀ ਗਿਰਾਵਟ ਦਾ ਇਲਜ਼ਾਮ ਕਾਰਕੁੰਨਾਂ ਦੇ ਸਿਰ ਮੜ੍ਹਿਆ ਸੀ।
ਆਪਣੇ ਮੁਲਾਜ਼ਮਾਂ ਨੂੰ ਭੇਜੀ ਇੱਕ ਈਮੇਲ ਵਿਚ ਸੀਈਓ ਮਾਰਕ ਜ਼ੁਕਰਬਰਗ ਨੇ ਘੱਟ ਰਹੀ ਆਮਦਨ ਅਤੇ ਤਕਨੀਕੀ ਉਦਯੋਗ ਦੀਆਂ ਸਮੱਸਿਆਵਾਂ ਦਾ ਹਵਾਲਾ ਦਿੱਤਾ ਹੈ।ਜ਼ੁਕਰਬਰਗ ਨੇ ਇਹ ਵੀ ਕਿਹਾ ਕਿ ਉਸਨੇ ਕੋਵਿਡ ਮਹਾਂਮਾਰੀ ਦੇ ਖ਼ਤਮ ਹੋਣ ਤੋਂ ਬਾਅਦ ਤੇਜ਼ੀ ਨਾਲ ਵਿਕਾਸ ਦੀ ਉਮੀਦ ਕਰਦੇ ਹੋਏ ਤੇਜ਼ੀ ਨਾਲ ਭਰਤੀ ਕਰਨ ਦਾ ਫੈਸਲਾ ਲਿਆ ਸੀ। ਜ਼ੁਕਰਬਰਗ ਨੇ ਕਿਹਾ ਬਦਕਿਸਮਤੀ ਨਾਲ, ਇਹ ਉਸ ਤਰ੍ਹਾਂ ਨਹੀਂ ਚੱਲਿਆ ਜਿਸ ਤਰ੍ਹਾਂ ਮੈਂ ਉਮੀਦ ਕਰਦਾ ਸੀ।
ਇਸ ਤੋਂ ਇਲਾਵਾ ਕੰਪਨੀ ਨੂੰ ਟਿਕ ਟੌਕ ਤੋਂ ਵੀ ਸਖ਼ਤ ਟੱਕਰ ਮਿਲ ਰਹੀ ਹੈ ਕਿਉਂਕਿ ਵਧੇਰੇ ਨੌਜਵਾਨ ਇੰਸਟਾਗ੍ਰਾਮ ਦੇ ਮੁਕਾਬਲੇ ਟਿਕ ਟੌਕ ‘ਤੇ ਵੀਡੀਓਜ਼ ਪਾਉਂਦੇ ਹਨ। ਮੈਟਾ ਇੰਸਟਾਗ੍ਰਾਮ ਦੀ ਵੀ ਮਾਲਕ ਹੈ।ਜ਼ੁਕਰਬਰਗ ਨੇ ਕਿਹਾ ਅਸੀਂ ਆਪਣੇ ਕਾਰੋਬਾਰ ਵਿੱਚ ਲਾਗਤਾਂ ਵਿੱਚ ਕਟੌਤੀ ਕੀਤੀ ਹੈ, ਜਿਸ ਵਿੱਚ ਬਜਟ ਨੂੰ ਘਟਾਉਣਾ ਸ਼ਾਮਲ ਹੈ। ਅਸੀਂ ਆਪਣੀ ਕੁਸ਼ਲਤਾ ਨੂੰ ਵਧਾਉਣ ਲਈ ਟੀਮਾਂ ਦਾ ਪੁਨਰਗਠਨ ਕਰ ਰਹੇ ਹਾਂ।
