ਟੋਰੰਟੋ ਪੁਲਿਸ ਦਾ ਕਹਿਣਾ ਹੈ ਕਿ ਟੋਰੰਟੋ ਦੇ ਇੱਕ 26 ਸਾਲਾ ਨੌਜਵਾਨ ’ਤੇ ਕਈ ਲੋਕਾਂ ’ਤੇ ਹਮਲਾ ਕਰਨ ਦੇ ਦੋਸ਼ ਲੱਗੇ ਹਨ। ਪੁਲਿਸ ਨੂੰ ਸ਼ੱਕ ਹੈ ਕਿ ਹੋਰ ਵੀ ਕਈ ਲੋਕ ਇਸ ਦੇ ਸ਼ਿਕਾਰ ਹੋਏ ਹੋਣਗੇ।
ਕਈ ਲੋਕਾਂ ’ਤੇ ਵੱਖ-ਵੱਖ ਥਾਵਾਂ ’ਤੇ ਹੋਇਆ ਹਮਲਾ
ਟੋਰੰਟੋ ਪੁਲਿਸ ਨੇ ਸ਼ੁੱਕਰਵਾਰ ਨੂੰ ਜਾਰੀ ਪ੍ਰੈਸ ਰਿਲੀਜ਼ ’ਚ ਦੱਸਿਆ ਕਿ ਪਹਿਲੇ ਦੋ ਹਮਲੇ ਯੂਨੀਵਰਸਿਟੀ ਐਵਨਿਊ ਅਤੇ ਵੈਲਿੰਗਟਨ ਸਟਰੀਟ ਵੈਸਟ ਇਲਾਕੇ ’ਚ ਵੀਰਵਾਰ ਸਵੇਰ 9:15 ਵਜੇ ਤੋਂ 9:30 ਵਜੇ ਦੇ ਵਿਚਕਾਰ ਹੋਏ।
ਪੁਲਿਸ ਨੇ ਦੱਸਿਆ ਕਿ ਇੱਕ ਔਰਤ ਯੂਨੀਵਰਸਿਟੀ ਐਵਨਿਊ ’ਤੇ ਉੱਤਰ ਵੱਲ ਨੂੰ ਜਾ ਰਹੀ ਸੀ ਜਦੋਂ ਸ਼ੱਕੀ ਵਿਅਕਤੀ ਨੇ ਦੱਖਣ ਵੱਲ ਨੂੰ ਜਾ ਰਿਹਾ ਸੀ। ਉਸ ਨੇ ਔਰਤ ਨੂੰ ਚੇਹਰੇ ’ਤੇ ਮੁੱਕਾ ਮਾਰਿਆ।
ਥੋੜ੍ਹੀ ਦੇਰ ਬਾਅਦ , ਇੱਕ ਹੋਰ ਔਰਤ ਡੇਵਿਡ ਪੇਕਾਉਟ ਸਕਵੇਅਰ ਤੋਂ ਲੰਘ ਰਹੀ ਸੀ ਜਦੋਂ ਸ਼ੱਕੀ ਵਿਅਕਤੀ ਉਸ ਦੇ ਕੋਲੋਂ ਲੰਘਿਆ। ਉਸ ਨੇ ਮੁੜ ਕੇ ਔਰਤ ਵੱਲ ਦੇਖਿਆ ਅਤੇ ਉਸ ਨੂੰ ਸਿਰ ਦੇ ਪਿੱਛੇ ਮੁੱਕਾ ਮਾਰਿਆ।
ਹੋਰਨਾਂ ’ਤੇ ਵੀ ਹੋਇਆ ਹਮਲਾ
ਸ਼ੁੱਕਰਵਾਰ ਨੂੰ ਵੀ ਐਡੀਲੇਡ ਸਟਰੀਟ ਵੈਸਟ ਅਤੇ ਪੀਟਰ ਸਟਰੀਟ ਇਲਾਕੇ ’ਚ ਸਵੇਰ 8:55 ਵਜੇ ਤੋਂ 9:00 ਵਜੇ ਦੇ ਵਿਚਕਾਰ ਦੋ ਹੋਰ ਲੋਕਾਂ ’ਤੇ ਹਮਲਾ ਕੀਤਾ ਗਿਆ।
ਪੁਲਿਸ ਦਾ ਕਹਿਣਾ ਹੈ ਕਿ ਇੱਕ ਆਦਮੀ ਸੜਕ ਪਾਰ ਕਰ ਰਿਹਾ ਸੀ ਜਦੋਂ ਸ਼ੱਕੀ ਵਿਅਕਤੀ ਨੇ ਉਸ ਨੂੰ ਪਿੱਛਿਓਂ ਸਿਰ ’ਤੇ ਮਾਰਿਆ ਅਤੇ ਫਰਾਰ ਹੋ ਗਿਆ।
ਥੋੜ੍ਹੀ ਦੇਰ ਬਾਅਦ, ਇੱਕ ਔਰਤ ਬਲੂ ਜੇਅਸ ਵੇਅ ’ਤੇ ਇੱਕ ਹੋਟਲ ਦੇ ਬਾਹਰ ਖੜ੍ਹੀ ਸੀ ਜਦੋਂ ਸ਼ੱਕੀ ਵਿਅਕਤੀ ਉਸ ਵੱਲ ਦੌੜਿਆ ਅਤੇ ਉਸ ਨੂੰ ਵੀ ਸਿਰ ’ਤੇ ਮਾਰ ਕੇ ਫਰਾਰ ਹੋ ਗਿਆ।
ਪੁਲਿਸ ਕਰ ਰਹੀ ਹੈ ਜਾਂਚ
26 ਸਾਲਾ ਇਸ ਸ਼ੱਕੀ ਵਿਅਕਤੀ ’ਤੇ ਕਈ ਹਮਲਿਆਂ ਦੇ ਦੋਸ਼ ਲੱਗੇ ਹਨ। ਪੁਲਿਸ ਨੂੰ ਸ਼ੱਕ ਹੈ ਕਿ ਹੋਰ ਵੀ ਕਈ ਲੋਕ ਇਸ ਦੇ ਸ਼ਿਕਾਰ ਹੋਏ ਹੋਣਗੇ। ਸ਼ੱਕੀ ਵਿਅਕਤੀ ਦੇ ਕਾਲੇ ਵਾਲ, 5 ਫੁੱਟ 9 ਇੰਚ ਲੰਬਾਈ, ਖੱਬੇ ਬਾਹ ’ਤੇ ਟੈਟੂ ਅਤੇ ਹਮਲੇ ਸਮੇਂ ਉਸ ਨੇ ਬੇਜ ਰੰਗ ਦੀ ਕਮੀਜ਼, ਕਾਲੇ ਸ਼ਾਰਟਸ ਅਤੇ ਨੀਲੀ ਲੈਨਯਾਰਡ ਪਹਿਨੀ ਹੋਈ ਸੀ। ਪੁਲਿਸ ਨੇ ਸ਼ੱਕੀ ਵਿਅਕਤੀ ਦੀ ਤਸਵੀਰ ਵੀ ਜਾਰੀ ਕੀਤੀ ਹੈ।
