ਕੀ ਹੁਣ ਪਟਾਕੇ ਜਾਂ ਆਤਿਸ਼ਬਾਜ਼ੀ ਚਲਾਉਣ ‘ਤੇ ਲੱਗੇਗੀ ਪਾਬੰਦੀ? ਇਸ ਦੀਵਾਲੀ ਸਿਟੀ ਆਫ ਬਰੈਂਪਟਨ ਨੂੰ ਮਿਲੀਆਂ 1000 ਤੋਂ ਵੱਧ ਸ਼ਿਕਾਇਤਾਂ
ਸ਼ਹਿਰ ਦੇ ਬੁਲਾਰੇ ਨੇ ਪੁਸ਼ਟੀ ਕੀਤੀ ਹੈ ਕਿ ਸਿਟੀ ਆਫ ਬਰੈਂਪਟਨ ਨੂੰ ਦੀਵਾਲੀ ਦੇ ਜਸ਼ਨਾਂ ਦੌਰਾਨ ਪਟਾਕਿਆਂ ਦੀਆਂ 1000 ਤੋਂ ਵੱਧ ਸ਼ਿਕਾਇਤਾਂ ਮਿਲੀਆਂ ਹਨ। ਦੀਵਾਲੀ ਮਨਾਉਣ ਲਈ ਲੋਕ ਪਟਾਕੇ ਚਲਾਉਂਦੇ ਹਨ, ਜਿਸ ਦੀ ਕੈਨੇਡਾ ਸਰਕਾਰ ਨੇ ਬਿਨਾਂ ਕਿਸੇ ਪਰਮਿਟ ਦੇ ਇਜਾਜ਼ਤ ਦਿੱਤੀ ਸੀ।
ਹਾਲਾਂਕਿ, 24 ਅਕਤੂਬਰ, ਦੀਵਾਲੀ ਵਾਲੇ ਦਿਨ, ਬਰੈਂਪਟਨ ਵਿੱਚ ਕਾਫੀ ਸ਼ਿਕਾਇਤਾਂ ਆਈਆਂ। ਇਸ ਸਾਲ, ਸਰਵਿਸ ਬਰੈਂਪਟਨ ਨੂੰ ਕੁੱਲ 1,004 ਪਟਾਕਿਆਂ ਨਾਲ ਸਬੰਧਤ ਸ਼ਿਕਾਇਤਾਂ ਪ੍ਰਾਪਤ ਹੋਈਆਂ। ਇਹ ਪਿਛਲੇ ਸਾਲ ਨਾਲੋਂ ਬਹੁਤ ਜ਼ਿਆਦਾ ਸੀ, ਜਦੋਂ 650 ਪਟਾਕਿਆਂ ਨਾਲ ਸਬੰਧਤ ਕਾਲਾਂ ਆਈਆਂ ਸਨ।
ਦੀਵਾਲੀ ਤੋਂ ਕੁਝ ਦਿਨ ਬਾਅਦ, ਬਰੈਂਪਟਨ ਵਿੱਚ “ਪਟਾਖੇ ਜਾਂ ਆਤਿਸ਼ਬਾਜ਼ੀ ‘ਤੇ ਪੂਰੀ ਤਰ੍ਹਾਂ ਪਾਬੰਦੀ ਲਗਾਉਣ ਲਈ” ਇੱਕ ਪਟੀਸ਼ਨ ਸ਼ੁਰੂ ਕੀਤੀ ਗਈ। ਇਸ ਪਟੀਸ਼ਨ ‘ਤੇ ਹੁਣ ਤੱਕ ਕਰੀਬ 7000 ਲੋਕ ਦਸਤਖਤ ਕਰ ਚੁੱਕੇ ਹਨ।
ਸਿਰਫ਼ ਆਤਿਸ਼ਬਾਜ਼ੀ ਹੀ ਨਹੀਂ, ਵੈਸਟਵੁੱਡ ਮਾਲ ਪਲਾਜ਼ਾ ਵਿਖੇ 400 ਤੋਂ 500 ਲੋਕਾਂ ਵਿਚਕਾਰ ਕਥਿਤ ਲੜਾਈ ਵੀ ਉਨ੍ਹਾਂ ਮੁੱਦਿਆਂ ਵਿੱਚੋਂ ਇੱਕ ਸੀ, ਜਿਸ ਨੇ ਦੀਵਾਲੀ ‘ਤੇ ਪੁਲਿਸ ਨੂੰ ਦਖਲ ਦੇਣ ਦੀ ਮੰਗ ਕੀਤੀ ਸੀ। ਘਟਨਾ ਦਾ ਇੱਕ ਵੀਡੀਓ TikTok ‘ਤੇ ਦਿਖਾਈ ਦਿੱਤਾ ਅਤੇ ਜਲਦੀ ਹੀ ਇਸਨੂੰ ਡਿਲੀਟ ਕਰ ਦਿੱਤਾ ਗਿਆ। ਪਟਾਕਿਆਂ ਤੋਂ ਰਹਿੰਦ-ਖੂੰਦ ਅਤੇ ਸਵਾਹ ਨਾਲ ਇਲਾਕਾ ਭਰਿਆ ਪਿਆ ਸੀ। ਦੋ ਵੱਡੀਆਂ ਭੀੜਾਂ ਨੂੰ ਪੀਲ ਰੀਜਨਲ ਪੁਲਿਸ ਅਫਸਰਾਂ ਨੇ ਵੱਖ ਕੀਤਾ, ਇੱਕ ਗਰੁੱਪ ਭਾਰਤੀ ਝੰਡੇ ਲਹਿਰਾ ਰਿਹਾ ਸੀ ਜਦੋਂ ਕਿ ਦੂਜੇ ਕੋਲ ਖਾਲਿਸਤਾਨ ਰਾਏਸ਼ੁਮਾਰੀ ਲਹਿਰ ਦਾ ਸਮਰਥਨ ਕਰਨ ਵਾਲੇ ਬੈਨਰ ਸਨ।
ਇਸ ਸਾਲ ਦੇ ਸ਼ੁਰੂ ਵਿੱਚ, ਬਰੈਂਪਟਨ ਸਿਟੀ ਕਾਉਂਸਲ, ਸਾਲਾਨਾ ਤਿਉਹਾਰ ਦੌਰਾਨ ਆਤਿਸ਼ਬਾਜ਼ੀ ਦੀਆਂ ਸ਼ਿਕਾਇਤਾਂ ਤੋਂ ਬਾਅਦ ਬਰੈਂਪਟਨ ਵਿੱਚ ਆਤਿਸ਼ਬਾਜ਼ੀ ‘ਤੇ ਪੂਰਨ ਪਾਬੰਦੀ ਬਾਰੇ ਵਿਚਾਰ ਕਰ ਰਹੀ ਸੀ। ਹਾਲਾਂਕਿ, ਇਹ ਵਿਚਾਰ ਜੂਨ ਵਿੱਚ ਰੱਦ ਕਰ ਦਿੱਤਾ ਗਿਆ ਸੀ ਜਦੋਂ ਸਿਟੀ ਨੂੰ ਭਾਈਚਾਰੇ ਅਤੇ ਹਿੱਸੇਦਾਰਾਂ ਨਾਲ ਸਲਾਹ ਕਰਨ ਲਈ ਕਿਹਾ ਗਿਆ ਸੀ।
ਮੇਅਰ ਪੈਟ੍ਰਿਕ ਬ੍ਰਾਊਨ ਨੇ Chinguacousy Park ਵਿੱਚ ਪਟਾਕਿਆਂ ਲਈ ਇੱਕ ਸਾਂਝੀ ਜਗ੍ਹਾ ਹੋਣ ਦਾ ਸੁਝਾਅ ਦਿੱਤਾ ਸੀ। ਹਾਲਾਂਕਿ, ਫਿਲਹਾਲ, ਇਹ ਅਸਪਸ਼ਟ ਹੈ ਕਿ ਕੀ ਇਹ ਪ੍ਰਸਤਾਵ ਕੌਂਸਲ ਕੋਲ ਲਿਆਂਦਾ ਜਾਵੇਗਾ ਜਾਂ ਨਹੀਂ।
